Asteartea, 2009ko ekainak 16.

Ofizialtasunaren alde egingo dute korrika igandean Bilbon, ESAITek antolatuta.

Hamargarren urtea du euskal selekzioaren aldeko herri lasterketak, eta 1.000 lagun inguru batzea espero dute.

G. Goikoetxea. Bilbo.

Urteurren borobila du aurten euskal selekzioaren aldeko lasterketak. ESAIT Euskal Selekzioaren Aldeko Iritzi Taldeak antolatuta, hamargarren aldiz izango da igandean korrikaldia, Bilbon. Herritar guztientzako moduko lasterketa dela esan zuten antolatzaileek atzo aurkezpenean, eta «aukera ezin hobea» ofizialtasunaren alde egiteko. Euskal Herria, nazio bat, selekzio bat, federazio bat izango du lelo lasterketak.

Uribitarte pasealekuan izango ditu irteera eta helmuga korrikaldiak. 15 urte baino gutxiagoko gaztetxoak hasiko dira, 11:00etan; 1.860 metroko ibilbidea prestatu dute haientzat. Ondoren, 15 urte baino gehiago dituztenak ariko dira, 11:30ean. 6.500 metro egin beharko dituzte.

Izena ematea ezinbestekoa da lasterketan parte hartzeko. Bizkaiko eta Laudioko (Araba) Forum dendetan egin daiteke hori, ostiralera arte. 15 urtez azpikoek doan dute izena ematea, eta gainerakoek zazpi euro ordaindu beharko dituzte. Igandean bertan ere izango da aukera izena emateko; bederatzi euro ordaindu beharko dira orduan. Parte-hartzaile guztiei elastiko bana emango diete.

Hamar urteetan lasterketa hobetu egin dela esan zuen Egoitz Askasibar ESAITeko kideak. «1.000 lagunetik gora biltzen ditugu, eta Euskal Herriko puntako kirolariak datoz». Aurten ere beste hainbeste jende batzea espero dute, haien artean atleta ezagunak. Jada baiezkoa eman dute, esate baterako, Iraia Garcia Euskadiko kros txapeldunak eta Unai Saenz de la Fuente maratoilariak.

© berria.info